- Mánudagur, 17. október 2011
Víðfeðm kynning á Þingvallaurriðanum
Þetta haustið hafa niðurstöður rannsókna Laxfiska á Þingvallaurriðanum verið kynntar víða með veglegum hætti.
Sú kynning endurspeglar sívaxandi áhuga fólks á þessum konungi íslenskra ferskvatnsfiski og lífsháttum hans. Í lok þessarar fréttar er að finna fróðlegar myndir og myndskeið frá urriðagöngunni á Þingvöllum síðastliðinn laugardag.
Umrædd fræðsla hófst þegar þrír stórurriðar úr Öxará fóru í Háskólabíó í áliðnum september þar sem þeir lögðu sín lóð á vogarskálar Vísindavöku Rannís og vottuðu um leið Háskóla Íslands virðingu sína á 100 ára afmæli skólans. Þar dvöldu urriðarnir í fiskabúri gestum sýningarinnar til ánægju en nóttina eftir tóku þeir að nýju til við hrygningu í Öxaránni. Hér fylgir mynd frá bíóferð urriðafélaganna.
Skömmu síðar var Kastljósi RÚV beint að urriðunum þegar Brynja Þorgeirsdóttir og samstarfsfólk hennar heimsóttu urriðana í Öxará heim og fjölluðu um rannsóknir Laxfiska á þeim.
Þeirri heimsókn var gerð ítarleg skil í þættinum Kastljósi sem sjónvarpað var 11. október 2011.
Síðasta almenna kynningin þetta haustið á Þingvallaurriðanum fór fram í Þjóðgarðinum á Þingvöllum þegar árleg fræðsluganga um urriðann var haldin í samstarfi Laxfiska og Þjóðgarðsins á Þingvöllum. Veðurhorfur voru ekki vænlegar þennan daginn en úr því rættist heldur betur þannig að gestir göngunnar fengu að fullu notið útiverunnar í fallegu umhverfi Þjóðgarðsins. Þátttakan í fræðslugöngunni var mjög góð því vel á annað hundrað manns mættu á bakka Öxarár. Gangan hófst við fiskteljarann sem staðsettur er undir brúnni við bílastæðið þar sem Valhöll stóð.
Gestir fræðslugöngunnar við brúna á Öxará þar sem Vaka-fiskteljarinn er.
Þar hófst kynningin en næsta stopp var undan flúðunum neðan við Drekkingarhyl þar sem margir urriðar voru sýndir samhliða því að fjallað var áfram um lífshætti þessara stórvöxnu íbúa Þingvallavatns. Meðal annars voru urriðar settir í stórt fiskabúr sem komið hafði verið fyrir uppi á árbakkanum þannig að fólk fékk gott tækifæri til að virða fyrir sér risaurriða af báðum kynjum.
Á meðal urriðanna sem sem fólki gafst kostur á að skoða var einhver athyglissjúkasti urriði sem nú er uppi, sem í mánuðinum áður skellti sér á Vísindavöku í Háskólabíó. Sú staðhæfing byggir á þeirri staðreynd að þegar veiddir voru urriðar fyrir urriðagönguna tranaði hann sér fram öðru sinni. Ekki nóg með það því sami fiskur var veiddur og merktur við hrygningu 2008 í Öxaránni, aftur við stangveiðar vorið 2009 í Þingvallavatni í merkingaskyni og enn aftur við hrygningu 2010 og loks nú fjórða árið í röð.
Urriðagöngunni lauk í fræðslumiðstöð Þjóðgarðsins við Hakið þar sem sýndar voru neðanvatnskvikmyndir og enn frekar fjallað um Þingvallaurriðann í máli og myndum. Í framhaldi göngunnar var fjallað um hana 17. október í Fréttablaðinu og Morgunblaðinu.
Í því skyni að gefa frekari innsýn í urriðagönguna 2011 fylgja hér nokkrar ljósmyndir og myndskeið.
Á vefsíðu Veiðikortsins er að finna fjölmargar góðar ljósmyndir frá göngunni.
Á vefsíðu Sogsmanna er að finna skemmtilegt myndskeið sem sýnir stórurriðana stíga urriðadans í fiskabúri sem Laxfiskar komu fyrir á bökkum Öxarár. Auk þess má finna ljósmyndir frá göngunni á vefsvæði Sogsmanna á sogsmenn.123.is
- Miðvikudagur, 05. október 2011
Laugardaginn 15. október kl. 14:00 verður hin árlega fræðsluganga Urriðadans á vegum Þjóðgarðsins á Þingvöllum og Laxfisk
a.
Gangan verður að vanda í umsjón Jóhannesar Sturlaugssonar hjá Laxfiskum og hefst klukkan14:00 á bílastæðinu þar sem Valhöll stóð.
Gangan spannar stutta og þægilega gönguleið upp með hrygningarsvæði urriðans. Fyrst er stoppað við brúna undan bílastæðinu til þess að fræða gesti um búnað sem er starfræktur þar undir brúnni sem gerir kleift að skrá ferðir urriða á leið til og frá hrygningarstöðvunum. Síðan er gengið með Öxará upp undir Almannagjá þar sem risaurriðar og aðrir minni verða skoðaðir og fjallað um lífshætti þeirra. Fræðslugöngunni lýkur í Fræðslumiðstöðinni við Hakið þar sem Jóhannes flytur erindi um Þingvallaurriðann með tilheyrandi myndasýningu. Þetta árið er ekki hægt að ganga upp í Fræðslumiðstöð þar sem gönguleiðin um Almannagjá er lokuð vegna framkvæmda við nýja sprungu efst í Kárastaðastíg. Því þurfa þeir göngugestir sem vilja hlýða á erindið í Hakinu að aka þangað.
Rétt er að minna á það að fólki er ætlað að hafa sína hentisemi varðandi það hve lengi það tekur þátt í göngunni. Því sumum hentar að sjá framan í nokkra urriða og heyra það helsta um lífshætti þeirra á meðan aðrir stoppa lengur við og hlýða jafnvel á erindið sem er í lokin í Fræðslumiðstöðinni við Hakið.
- Miðvikudagur, 20. júlí 2011
Göngur laxins í Elliðaánum 2011
- Vöktunarrannsóknir Laxfiska 
Í ár tók rannsóknafyrirtækið Laxfiskar við árlegum fiskirannsóknum í Elliðaánum sem meðal annars taka til vöktunar á göngum laxins. Laxfiskar tóku að sér fiskirannsóknirnar og tilheyrandi vöktun að beiðni Stangaveiðifélags Reykjavíkur sem hefur umsjón með Elliðaánum fyrir hönd Orkuveitu Reykjavíkur og Reykjavíkurborgar. Hér er gefin innsýn í þessi rannsóknaverk 2011 og niðurstöður þeirra.
Fyrst kíkjum við á rannsóknir á ferðum laxins (gönguseiðanna) til sjávar og síðan lítum við á göngur laxins í Elliðaárnar úr sjó sem eru í fullum gangi þessar vikurnar.
Ganga laxaseiða til sjávar
- Á fjórða þúsund seiði komu í gildruna á mánaðartíma
Til að fá árlegan samanburð á útgöngu laxaseiða í Elliðaánum og vexti þeirra og lífslíkum í hafi þá var í byrjun sumars staðið fyrir gildruveiði undan stöðvarhúsi virkjunarinnar í Elliðaánum (Rafstöðinni) á gönguseiðum laxa. Þar voru þau talin daglega og hluti þeirra merktur með örmerki sem skotið er í trjónu þeirra og samhliða var mæld þyngd og lengd þeirra seiða. Venju samkvæmt var veiðiugginn klipptur af laxaseiðunum samhliða örmerkingu þannig að örmerktu laxarnir þekkist þegar þeir ganga í Elliðaárnar eftir dvöl á ætisslóðum í hafi í um 1 ár (smálax) eða eftir um 2ja ára sjávardvöl (stórlax). Ljósmyndin er af gönguseiði úr Elliðaánum sem var örmerkt sumarið 2011.
Útganga gönguseiðanna 2011 var einstaklega kröftug. Á mánaðartíma, frá 10. maí til 8. júní þá gengu 3341 seiði í gildruna á leið sinni til sjávar, eins og sjá má á súluriti með því að smella hér.
Gönguseiði í Elliðaánum.
Kvikmyndaskeið.
Göngur laxa og silunga
- Talning, stærðarmæling og kvikmyndun
Fiskteljari sem staðsettur er við Rafstöðina telur fiska sem komnir eru af seiðastigi sem um hann ganga og ákvarðar lengd þeirra, hvort heldur þeir eru á leið upp um teljarann eða á göngu niður fyrir teljarann. Auk þess sér fiskteljarinn um að kvikmynda fiska sem ganga upp um teljarann. Þau gögn nýtast meðal annars til að skoða hve margir örmerktir laxar (veiðiuggaklipptir) ganga upp fyrir teljarann og sú tala ásamt veiðibókargögnum yfir veiði á örmerktum löxum fyrir neðan teljarann gerir kleift að ákvarða eiginlegar endurheimtur laxa úr sjó. Heildarfjöldi laxa sem gengið hafa upp um teljarann er nú ríflega 1100 og eru þá ótaldir þeir fjölmörgu sem veiddir hafa verið neðan teljarans. Undanfarna daga hefur verið mikill kraftur í göngunni og sem dæmi má nefna að s.l. mánudag (þ. 18. júlí) gengu ríflega 100 laxar upp í gegnum teljarann yfir sólarhringinn.
Tölur yfir göngur laxa og silunga um fiskteljara í Elliðaám birtast jafnóðum á veraldarvefnum
- Yfir 1100 laxar gengnir upp í gegnum teljarann
Gögnum yfir ferðir fiska um teljarann við Rafstöðina í Elliðaánum er nú varpað á vefsvæði þannig að áhugasamir veiðimenn og aðrir geti fylgst með framþróun göngunnar. Sjá teljaratengil hér efst á síðunni, vinstra megin.
Laxar á leið um teljarann.
Kvikmyndaskeið.
- Föstudagur, 16. september 2011
í Háskólabíói föstudaginn 23. september kl. 17-22
Eins og undanfarin ár munu Laxfiskar vera með sýningarbás á þessum árlega viðburði þar sem almenningi gefst kostur á að kynnast starfi vísindafólks.
Í bás Laxfiska verða lifandi fiskar til sýnis og rannsóknir á ferðum fiska kynntar undir kjörorðinu Ferðaglaðir fiskar. Vef Vísindavöku má finna hér.